كتير أوي أكون رايح كارفور عشان أشتري حاجة معينة في بالي ، مناديل مثلا أو زجاجة زيت أو كرتونة لبن ، وفي كل مرة وأنا
ماشي ألاقي عرض على جبنة أو فراخ أو شيكولاتة أو غيره ، فآخد واحدة من هنا واحط في العربية وواحدة من هنا وأحط في العربية
وعرض من هنا وأحط في العربية وأنا بقول في بالي : 9 جنيه بس .. بسيطة ، 12 جنيه ونص ما تخسرش ، 24 جنيه بس ! والله فرصة !!
اجي بقا أخش على الكاشيير بمنتهى الثقة وفي بالي إني هادفع 80 - 90 جنيه ، أو يعني لو اتمعظت أوي هادفع ورقة بمية ... وبعد ما
الراجل يضرب الحاجات كلها على المكنة اللي بتعمل (توت) دي ، ألاقي الحساب 500 - 600 جنيه !!!
طبعا إحساس الصدمة بيبقى رهيب ، وبفضل فاتح بُـقي من كتر الصدمة فترة طويلة والدبان داخل طالع الله ينور !!
والحمد لله في كل مرة ربنا بيسترها معايا وبيبقى معايا فلوس احتياطي أو مراتي جمبي ومعاها فلوس زيادة في شنطتها !!
عارفين بقا الموقف ده ! في كل مرة بيحصللي بفتكر حديث رسول الله صلى الله عليه وسلم : " إياكم ومحقرات الذنوب ، فإنهن يجتمعن
على الرجل حتى يهلكنه " !!
تخيل تكون واقف أمام الله يوم القيامة وانت فاكر نفسك من المقربين الأبرار ، وفجأة تلاقي جبال عاتية من الذنوب الصغيرة المجتعمة والمتكومة فوق بعض !!
يا ترى هل يكون عندنا رصيد حسنات يغطي كل ده ؟؟
ولا كفة السئيات هتنزل وتاخدك معاها للهاوية ؟؟
علاج السحر
0 التعليقات:
إرسال تعليق